UPATIKANAJI WA GESI ASILIA KWA MATUMIZI YA MAGARI JIJINI DAR ES SALAAM

  

TAARIFA KWA UMMA

 

UPATIKANAJI WA GESI ASILIA KWA MATUMIZI YA MAGARI JIJINI DAR ES SALAAM

Kumekuwepo na mwitikio mkubwa wa Wananchi wa Jiji la Dar es Salaam kuweka mfumo ya gesi asilia (CNG) kwenye magari yao ili kuweza kupunguza gharama ya uendeshaji wa magari. Watumiaji wa gesi asilia kwenye magari wanaweza kuokoa hadi zaidi ya asilimia 45 ya gharama ya matumizi ya mafuta.

Mpaka sasa, tunavyo vituo viwili katika mkoa wa Dar es Salaam kikiwemo cha Ubungo kinachomilikiwa kwa Ubia kati ya TPDC na PANAFRICA na kile kinachomilikiwa na Anric kilichopo Tazara. Lakini pia, Kampuni ya Dangote inamiliki kituo binafsi kilichopo Mtwara. Vituo vingi zaidi vinahitajika ili kukidhi mahitaji yaliyoongezaka kwa wingi katika muda mfupi.

Jumla ya vituo 9 vya kujaza gesi kwenye magari vinatarajiwa kujengwa na kukamilka ndani ya miezi 24 ijayo, ambapo;

1. Vituo viwili vya kujaza gesi kwenye magari vitapatikana kabla ya mwisho wa mwaka huu. Vituo hivyo vinajengwa na kampuni ya TAQA DALBIT katika maeneo ya Uwanja wa Ndege na kituo kingine kitajengwa Sinza mkabala na barabara ya Sam Nujoma. Vituo hivi vitakuwa na karakana za kuweka mifumo ya CNG kwenye magari. Aidha, vifaa vya kujenga vituo hivi tayari vimeanza kusafirishwa kuja nchini.
2. Kituo Kikuu (Mother Station) cha TPDC kitajengwa Mlimani City barabara ya Sam Nujoma. Kituo hiki kitakuwa na uwezo wa kujaza magari sita kwa wakati mmoja pamoja na malori sita ya kubeba CNG kupeleka kwenye vituo vidogo. Kituo mama hicho kitaweza kuongeza kasi ya uwepo wa vituo vidogo vya kujaza gesi kwenye magari. Kituo hiki pia kitakuwa na Karakana ya uwekaji wa mifumo ya gesi kwenye magari itakayoendeshwa na Chuo Kikuu cha Dar es Salaam. Mkandarasi wa ujenzi wa kituo hiki ameshapatikana.
3. Vituo vingine vitakavyojengwa katika kipindi cha miezi 24 ni pamoja na; kituo kitakachojengwa Bagamoyo na kampuni ya TURKY Petroleum, kituo kitakachojengwa na Kampuni ya Anric huko Mkuranga, kituo kitakachojengwa na Kampuni ya BQ katika maeneo ya Goba, na kituo kitakachojengwa na Kampuni ya DANGOTE Mkuranga. Aidha, TPDC ilikwishatoa idhini kwa makampuni jumla 20 kujenga vituo vya CNG nchini.

Foleni zinazoonekana kwa sasa katika kituo cha kujaza gesi asilia kwenye magari cha Ubungo, zimetokana na hitilafu iliyotokea katika gari linalobeba gesi (CNG tanker) kupeleka kituo cha Anric TAZARA, ambapo bomba lake la kupokelea CNG limepasuka, na linafanyiwa matengenezo na kutarajiwa kuanza huduma mwishoni mwa wiki ijayo.

Ni matumaini yetu kwamba huduma katika kituo cha Anric TAZARA itarejea na kupunguza adha inayoendelea kwa sasa, hata hivyo inatarajiwa kuwa ndani ya miezi 24 vituo vya CNG vitaenea kwa wingi hapa nchini na kuondoa changamoto zinazoonekana kwa sasa na kuwezesha wananchi wengi kunufaika na huduma hii.

 

 

Imetolewa na;

Kitengo cha Uhusiano na Mawasiliano

Shirika la Maendeleo ya Petroli Tanzania

Jengo la PSSF Kambarage/ Ghorofa ya 8, Mtaa wa Jakaya Kikwete

S.L.P 1191

DODOMA.